വിട്ടുനിൽക്കുന്നവർ

— ഹാ ജിൻ (1956-)

നാടുവിട്ട് നിൽക്കുന്നവരെ ഞാൻ
ഇപ്പോഴും സ്തുതിയ്ക്കുന്നു,
ജനിച്ച അന്നുമുതൽ വീട് തേടി
ദൂരങ്ങൾ താണ്ടാൻ തീരുമാനിച്ചവരെ.
തങ്ങൾ എവിടെയാണെന്ന്
നക്ഷത്രങ്ങളിലൂടെ അവർ അറിയുന്നു,
സാങ്കൽപ്പിക ആകാശത്തിന്റെ അറ്റത്ത്
അവരുടെ വേര് പടരുന്നു.

ജീവിതം അവർക്ക് വളവുതിരിവുള്ള യാത്ര,
തങ്ങുന്ന ഇടമെല്ലാം മറ്റൊരു യാത്രാരംഭം,
അവർക്കറിയാം പാതയിൽ
താനില്ലാതാകുമെന്ന്, അപ്പോഴും
ജീവിച്ചിരിക്കുന്നിടത്തോളം കാലം
ചെന്നെത്താനാഗ്രഹിക്കുന്നിടത്തേക്ക്
മരണം അവർക്കു കൂട്ടുചേരും,
എങ്കിലും, ആരുടെയൊക്കെ
വഴിതേടും ഭൂപടങ്ങളാണ്
തങ്ങളുടെ പാദമുദ്രകളാൽ
മെച്ചപ്പെടാൻ ഇടയുള്ളതെന്നതിനെപ്പറ്റി
അവർക്ക് ഒരു ധാരണയുമില്ല.

ഹാ ജിൻ കവിതകൾ