— ഗുന്തർ അയ്ച് (1907-1972)
ഇതെന്റെ തൊപ്പി,
ഇതെന്റെ കുപ്പായം,
സഞ്ചിയിലിരിക്കുന്നത്
എന്റെ ഷേവിംഗ് കിറ്റ്.
ഈ തകിടുപാത്രം
എന്റെ പ്ലേറ്റും ഗ്ലാസ്സുമാണ്,
അതിന്മേൽ ഞാൻ എന്റെ പേര്
ചുരണ്ടിവെച്ചിരിക്കുന്നു.
മോഷ്ടാക്കളുടെ കണ്ണിൽപ്പെടാതെ
സൂക്ഷിച്ചുവെച്ച
ആണികൊണ്ടാണ് ഞാനതിൽ
എന്റെ പേരെഴുതിയത്.
എന്റെ ആഹാരസഞ്ചിയിൽ
ഒരുജോഡി കാലുറകളും
പിന്നെ ഞാൻ ആരെയും
കാണിക്കാത്ത വസ്തുക്കളുമുണ്ട്
രാത്രികളിൽ
അതെന്റെ തലയണ,
ഈ കട്ടിയുള്ള കടലാസ്സ്
തറയിൽ വിരിച്ചു ഞാനുറങ്ങുന്നു.
ഈ മുറിപ്പെൻസിലിനോടാണ്
എനിക്കേറെ പ്രിയം;
രാത്രി എന്നിലേക്കുവരുന്ന വരികൾ
പകലിൽ അവ എഴുതിവെക്കുന്നു.
ഇതാണെന്റെ നോട്ട്ബുക്ക്:
ഇതെന്റെ ക്യാൻവാസ്,
ഇതെന്റെ തോർത്ത്,
ഇതെന്റെ നൂൽ.
മലയാള കവി. പരിഭാഷകൻ. 'വെയിലും നിഴലും മറ്റു കവിതകളും' ആദ്യ കവിതാസമാഹാരം. കവിതകൾ ഇംഗ്ലീഷ്, തമിഴ്, കന്നട ഭാഷകളിലേക്ക് പരിഭാഷ ചെയ്യപ്പെട്ടിട്ടുണ്ട്. കൊച്ചിയിൽ താമസം.