ലോകം അമിതമായി സംസാരിക്കുന്നു;
അത് ശരിയാണെങ്കിൽ നമുക്ക്
എല്ലാവർക്കും മിണ്ടാതെയിരിക്കാം,
നിശബ്ദതയുടെ സംസാരം കേൾക്കാം.
ലോകം അമിതമായി കാണുന്നു;
അത് ശരിയാണെങ്കിൽ നമുക്ക്
എല്ലാവർക്കും കണ്ണുകളടയ്ക്കാം,
അടഞ്ഞ കണ്ണുകൾക്കു പിന്നിലെ
ഉൾക്കാഴ്ച കണ്ടിരിക്കാം.
ലോകം അമിതമായി കേൾക്കുന്നു;
അത് ശരിയാണെങ്കിൽ നമുക്ക്
എല്ലാവർക്കും ചെവിയടയ്ക്കാം,
താന്തോന്നിക്കാറ്റിൻ്റെ വഞ്ചന
നേരിടുന്ന നമുക്കുള്ളിലെ
ശുദ്ധസംഗീതത്തിന് കാതോർക്കാം.
ലോകം അമിതമായി ചലിക്കുന്നു;
അത് ശരിയാണെങ്കിൽ നമുക്ക്
പ്രതിമപോലെ നിൽക്കാം
മരങ്ങളുടെ ഉറച്ച തീരുമാനത്തെ
അനുകരിക്കാം, ചലിക്കാതെ ചലിക്കാം.
ഊമയായി നുണ പറയാതിരിക്കാം.
അന്ധനായി ഒളിഞ്ഞുനോക്കാതിരിക്കാം.
ബധിരനായി ഒളിച്ചുകേൾക്കാതിരിക്കാം.
മുടന്തനായി കൈയേറാതിരിക്കാം.
'If It is True' by Richard Ntiru from The Penguin Book of Modern African Poetry
